انا وعمران - قصة واقعية مؤلمة

#1 12-25-10, 06:32 PM

طلبتكم بنات لا تعيدون غلطتي

اليوم بحط بين ايدينكم قصة حبي ـ الي ماكو حب اصدق عنه ـ كان اهو الحل لجميع مشاكلي ، وكان يدامي طول الوقت ، بس انانيتي عمت عيني و خلتني ما اشوفه ، عزيزاتي خواتي فالله ، اكتب لكم ودموعي والله الشاهد على خدي ، واشهق من الصياح ..

تبدا قصتي ، من لما دخل النت بيتنا وانا عمري 14 سنة .. كان تفكيري بريء وطفولي .. بحكم عمري ، كنت من مدمنين منتدى ألم الامارات ، اكيد تعرفونه منتدى القصص الي كلنا بطفولتنا جابلنا قصصه و قريناها ، مع الاسف التسجيل كان يتطلب وجود ايميل ، ونحن ما كنا نعرف كيف نسوي ايميل او نحط اشارة @ .. وبعدها اختي الكبيرة تعلمت تسوي ايميل من ربيعاتها و سوت لي ..

و بعدها بسنة خبرتني بنت جيراننا عن منتدى هي دوم تدخله وكل اهلها مشتركين فيه .. وسجلت وبديت اشارك ، كنت انا الي يسوي جو بالمنتدى ، احاول اخلي نفسي مهرج عشان الكل يضحك ، و الكل حب تواجدي ، بعدها بفترة نزلت موضوع ديني ، والكل قام يتطنز ، فلانة المخترشة ـ استوت مطوعة .. اضاربت ويا الاعضاء _ ف تدخل المشرف و طلب ايميلي ع الخاص ، وقال انه موضوع ضرروي ، و بحكم اني ما جربت الطرد قبل ، قلت اكيد هم يرمسون الاعضاء ع المسن و يبلغونهم انهم مطرودين .. و طرشت له ايميلي ، و لما ضافني رمسنا ، وبعدها خبرني عن المشكلة وطلب مني اعتذر للعضو وجذي ، و قالي عن اذنج وراي دوام ، و اشوفج باجر الساعة ثمان ، و طلع .

يوم بعد يوم صرنا نرمس بعض .. عمرهـ كان 27 واسمه خليفة .. قالي انه مب معرس .. ، وعقب فترة قالي الاحسن ابعد ، انا بترك هالمنتدى وبسجل بمنتدى ثاني و لحقته للمنتدى الي هو فيه ، ولما شاف اني مستعده الحقه ، ردينا لبعض ,,,

وبعدها بديت ارمسه فون ع اساس انه اخو ، مو حبيب ، ولاعمرنا رمسنا بمواضيع تحتها خطوط حمرا ، و عقب فترة سألني : تحبيني ؟ قلت له هيه احبك .. قالي انا شو بالنسبة لج؟ اخوج ؟ حبيبج قلت له : مثل اخوي .. زعل ، وحاولت اراضيه لاني ماحب حد يزعل مني ، و قلت له لالا احبك مثل حبيبي بس ما رضى وبند، وبديت اعامله ع هالاساس، بس ما اعطيه وايد من كلام الحب ، وامسك نفسي عنه ، يعني اغيب يومين و اكلمه واقول لا كنت مشغوله ، ما حسيت ان مر يومين ، ومن هناك انا مشتاقتله و ابي اكلمه ، كنت اتحراه انسان مافي مثله ، كان يبين لي انه مثقف ، ملم بالحوار ، و الآداب . وانا ياهل صدقته ..

تشاوفنا بعدها انا وخليفة مرة بمحل كان بطابقين و التقينا بالطابق الي فوق ، شافني و جذبته عيوني .. مع اني كنت بس متكحلة وحاطة جلوس وردي .. يعني بدون ماسكرا بعد !! .. وشكلي جدا ً عادي .. و طلب مني نرد نتشاوف ، وتشاوفنا ف سينما و لا مسكت ايده حتى ـ او تجرأ يلمسني .. وبعدها عطيته دفتر خواطري ، و فكر كيف يعلقني فيه ، و بدا يسويلي سوا عشان انجذب له وما اخليه ويقدر انه ياخذاغلى ما تملك البنت ( شرفها ) ، وكان السحر الي سواه لي سحرالمحبة " التوله " ..
بس انقلب السحر لان الساحر ما يعرف يسويه ، وبدال ما احب خليفة واكره كل الرياييل استويت احب له المضره وبالمقابل عادي ارمس كل الشباب ، عادي احدر الشات و ارمس واحد عن مواضيع وصخه ( افلام + صور ) و انا ما عرف اسمه شو ..

و المشكلة ان المدير( احمد 21 سنة ) بالمنتدى اليديد بدا يرمسني ع المسن ، واما كيف ياب ايميلي : فهذا لانه فالادارة ـ خذ ايميلي وضافني بروحه , رمسته ع المسن و قام يتشكالي و اغلب مواضيعه طفولية ( انا زعلان ابوي ما اشترا لي دراجة لانه يخاف علي ) .. قلت لنفسي بخلي هالانسان شرات اخوي ، بنشغل عنه ب خليفة عشان ما يحس اني لصقة .. و اني وايد احبه ، وقدر يعلقني .. وبعد فترة بالشهور قالي المدير انه يحبني .. ف تهربت منه بالدليت ..

عقبها افترقت عن خليفة ، واكتشفت انه معرس وعنده 4 يهال ، و معرس من عمره 20 تقريبا ً ..و حرمته من الاهل ، وتقرب له . ودرت خليفة وبديت علاقة باحمد ، وبسبت السحر استويت ارمس كل حد ، و واعدت احمد بموتره و صارت بيننا اشيا .. وكرهت نفسي .. بس ما كنت اقدر اوقف هالشي .. صرت عدائية ـ زاد السحر فيني ، صرت اكره اخوي ، واضربه لوحط ايده ع جتفي بالغلط ، و عادي اشل السجين والحق وراه فالبيت واقوله بذبحك .. و انفج السحر بعد تاريخ 2- اكتوبر – 2010 م

بديت احس نفسي ضايعة واني مب عارفة انا منو .. كنت ماشيه بدرب غلطت .. انولدت من يديد .. بس شو الفايده اذا انا ما اعرف انا منو ؟ شنو احب ؟ شنو اكره ؟ حتى ربيعات ما عندي .. طول فترة دراستي وانا ما احتك ب بنات بس اتعرف ع شباب .. ماعرف شو لوني المفضل او وجبتي المفضلة ما اذكر شي .. ومع الايام اتذكر .. سواء بحلم .. او من خلال قرايتي لبعض الصفحات الي كتبتها لما كنت مضايجة ، بدفاتري عن علاقاتي بالشباب واساميهم وارقامهم .. و معلومات عن عوايلهم .. تواريخ ميلادهم ..وماشابه ..

و حسيت بضيج فضيع ..

لين تعرفت ع (راشد) وهو عمره 18 واكبر عني .. بديت علاقتي فيه .. وكنت مرتاحه بقربه .. بس مع الاسف بنت خالته تدخلت بعلاقتنا و سوت فتنه من بيننا .. كانت تقولي انه يخونني .. وتخبره اني اخونه .. لين تعبت من علاقتنا وبعدت عنه .. و قلت لنفسي انا غلطت لما حبيت من قلبي .. و هالنتيجة .. وثقت في أول بنت ف حياتي ( بنت خالته منيرة ) وهذي يزاتي ..

صحت وايد .. و صرت اردد بيني وبين نفسي .. ليت السحر ما انفج .. ليتني بعدي تايهة .. ع الاقل كنت اعرف اني حثاله .. و مرتاحة بهالشي .. و قلت خلني احاول اسوي الي كنت اسويه قبل ارمس شباب .. و بديت ارمس بعض الي كنت ارمسهم قبل .. و عقب سجلت ب الفيس بوك .. اول مرة ف حياتي .. و تعرفت ع (عمران) .. انسان صادق .. وفي .. مخلص .. مافي شراته باختصار ..

بعد كل هالحثالة الي مريت عليهم .. لقيت انسان صج يستاهل الاحترام والتقدير .. انسان حب مرة بنت يرانهم .. كتم حبه .. كمل دراسته الجامعية وهدفه الزواج .. رد البلاد .. خبرها بانه يباها وبيتقدم لها .. قالت له لأ .. خلنا نرمس فون بالاول نتعرف ع بعض .. و بعد مدة .. خانته .. و رفضته .. عشان واحد ما يسوى ظفر من اظافره ..

و اعتزل الحب لين صار عمره 25 .. والتقى فيني .. فعلا ً كان مبين انه اعتزل الحب .. مندمج بشغله .. شاغل نفسه بتجارته .. لين كون له اسم وسمعة .. بنى نفسه بنفسه .. انسان يستاهل تنرفع له القبعة .. ريال بكل معنى الكلمة ..

بس انا كنت مابي احبه .. كنت بعدي منشغلة ب رثاء نفسي ف حب راشد .. وغصب عني انجرفت ورى حزني.. حاولت اتغير اترك الشباب بس ما قدرت .. ابوي كل يومين يقولي باجر بغير الرقم .. و اما عمران بديت الاحظ انشغاله ب شركاته .. و اقول لنفسي خلاص ما بحشره .. يبين انه يوم يشوف مكالماتي يتضايق .. مع ان عمره ما قال ( انا ضايق من مكالماتج ) .. و هو حس اني ما عدت ادق له شرات قبل .. وهو كان صج مستعد ياخذني .

راقب رقمي .. و شاف ان اللستة كلها شباب .. و تسجلت مكالمتين وسمعهم .. تضايج .. صارحني .. وقالي بعطيج فرصة ..

كان التاريخ 16- ديسمبر – 2010 م الخميس ..قالي انظفي ورديلي .. وبتاريخ 24 – ديسمبر – 2010م .. صارحني انه ما يقدر يرمسني .. قالي انا احس اني غلطت .. قلت له ليش ؟ وكيف غلطت ؟ قالي : لما عطيتج فرصة .. ما كان لازم اعطيج .. انتي خنتيني .. كرامته ما عادت تسمح له .. لانه صج انجرح مني .. من كثر ما حبني كان مستعد .. ياخذني من يديد .. وانا والله والله .. كنت حاطة ببالي اني ع 2011 خلاص راح ابدا .. مع العام اليديد حياة يديدة .. صحت وايد .. ضجت وايد .. احس اني اخيرا ً لقيت الانسان الي لازم اصابعه تملي الفراغات الي بين اصابع ايدي .. و ضيعته .. ابي ارده لي .. بس ادري خلاص .. ماراح اقدر ..

قالي بنفسه : ( احبج .. بس هذا ما يمنع اني ابتعد لما احس اني غلطت ) .. يحس انه ارتكب معاي غلطة .. لما عطاني قلبه و هو واثق اني غير عن كل البنات .. والله اني رقدت 5 الفير .. و حلمت اني قربه .. معاه .. لاوية عليه .. كان هو يالس ع اللاب عاطني ظهره و يكتب ويبتسم .. وانا وراه بالضبط .. وبيننا فالنص عمود يعني لاوية ع الحاجز و ايدي بس ع صدره .. اشوفه بس ما يشوفني .. اسمعه .. واسمع كلامه .. يضحك .. يغني بصوته الي تعودت عليه .. و نتحاور .. ليتني ليتني ما غلطت هالاغلاط كلها .. ليتني ما فقدت الامل بالحياة .. شو يفيد الندم الحين ؟ بيرد لي عمران ؟ ما ظن ..

خواتي الحب مرة بالعمر .. وهذيني طفت ع كل الحثالة .. و لقيت ان الحب الي يستاهل كان الوحيد الي ما حاولت انجحه .. او بذلت ادني جهد عشان اخليه يعيش .. بايدي جتلته .. تكفون لا تعيدون غلطتي .. لا تنجرفون ورى احزانكم وترمسون بدال الواحد الف .. دخلتي علاقة مع واحد .. عقب فترة حسيتي ان غلطتي باختيارج ولا تسرعتي لما قلتي احبك يا فلان .. ابعدي .. لا تجبرين عمرج تستمرين وتخونينه من الصوب الثاني .. دخيلكم بنات لا تكررون مأساتي ..