03-07-17, 06:18 PM
|
|
رساله ورد " (( مشترك )) مساء الخير ..
طبعاً موضوعي عباره عن فكره لتطوير أروحنا ..
تطوير أنفسنا وجوهرنا ..
وهو " رساله ورد " لكل من يقرأ ..
الفكره ، عبارات وأتكلم عن مغزاها بطريقتي وتعبيري ، أتمنى إني أوصل فيها فكره وهدف ..
وأتمنى الموضوع ينال على رضاكم ، وأيضاً لاتحرموني تعليقاتكم اللطيفه .. بسم الله .. " المسامحون أطهر الناس قلوباً ، لأنهم أدركوا قيمة الدنيا فاستحقروا أخطاء البشر "
المسامح كريم ، والدنيا فانيه ، والحياه جميله ، والأمور بسيطه وكل شيء بينحل بالتفاهم وسعة الصدر ، وكل مشكله ولها حل مهما كانت معقده الا إنها بالأخير بتنحل ، يعني ماله داعي الزعل والحزه اللي بالخاطر ، من جد يا ناس مافيه شي يسوى ، لما تكون قلوبنا بيضا ونقيه وطاهره راح نعيش حياه جميله وهاديه ، وغير كذا ما ننسى قول الله تعالى : ( إنّ الله عفوٌ يحب العفو ) اذا كان ربي رحيم فينا ويعفو عنّا ويسامح المخطي ويقبل توبة التائب ، مو عيب علينا احنا مانعفو ؟ مو نخجل من أنفسنا لما يطول الزعل ؟ أصلاً راح تصير آثار كبيره وسلبية بعدين اذا زاد الشيء عن حده ، عشان كذا خلونا نطور من أنفسنا ونصفي قلوبنا ونروح نراضي اللي زعلان ونسامح الغلطان ونكون قدوه لغيرنا بالطيبه والأخلاق الراقيه ، لأن زي ما ذكرت فوق الحياه فانيه وما فيه شيء يسوى أبد .. " الستر على مسلم : أمرٌ ليس بالسهل ، لأن الإنسان بطبيعته فضولي ، لذلك كان جزاء من يستر أخاه ، بأن يستره الله يوم القيامة أمام جميع الناس "
طبعاً معروف عنا نحب نسولف بالأخبار اللي نسمعها ونحب نبحث ونستفسر وكيف وليش ومتى وووو،،،،،،،،،،،،،،،، الخ ، شيء طبيعي حتى أنا كذا أحيانا ، لكن فيه أشياء المفروض اننا اذا سمعناها نوقفها عندنا وما نكمل نشر لأن ما يصلح أو عيب ، لأن بعض المواضيع والأخبار تكون ضرر لأصحابها لو انتشرت ، ممكن انها فضيحه او ممكن انها غلطه او ممكن انها غير مقصوده ، يعني نكون ذوق وناس متفهمين ونقفل على سيرة هالخبر ، ونحاول نكون ناس فيها خير ونقدم مساعده اذا كان بأيدينا شيء نسويه ، او اننا نسكت ، لأن ما ندري يمكن يوم من الأيام ننحط بهالموقف إحنا وقتها نتمنى أحد يفهم شعورنا ويقدره ويحاول إنه ما يتكلم او يسولف ، نستر على غيرنا ونكون عون لهم ، نطور من تفكيرنا ومن تصرفاتنا ونكون ناس ذات حكمه بالكلام والتصرف شوي ، لأن جزاء من ستر على أخاه يستره الله يوم القيامه ، يعني فضل عظيم ولله الحمد .. " كن طبيعياً و صريحاً ،لا تتصنع ولا تستخدم اكثر من وجه ، من يريدك بعيوبك سيأتيك ، ومن لا يريدك امضي انت وكرامتك بعيداً عنه "
بمعنى إننا نكون عفويين وعلى فطرتنا ، ما نغير مبادئنا عشان شخص ، او نغير افكارنا وطبيعة تصرفاتنا عشان نرضي أحد ، لا لا لا نبقى زي ما ربي خلقنا ، سبحان الله العفويين دايم ناس محبوبين لانهم طيبين وعلى الفطره ، اللي بقلوبهم على السنتهم ونشوفها بافعالهم بعد ، يعني بسيطين متواضعين وحبوبين ، نبي نكون كذا ، لأن " رضا الناس غاية لا تدرك " ماهو لازم نرضي الكل اهم شيء رضا ربي واهالينا وانفسنا والباقين ان عجبناهم أهلاً وسهلاً وإن ما عجبناهم مو شرط ، بالاول وبالاخير كل شخص بالحياه له دستور وله تفكير وله مبادئ ، وكلن على همه سرى ، خلاص إحنا نكون صريحين مع انفسنا قبل الكلا ، ونكون عفويين بتصرفاتنا طبعاً بادب واحترام ، نطور من انفسنا ومن اللي حولنا ونرزع التصرفات البسيطه بين بعضنا البعض ، نكون لطيفين بتعاملنا وصادقين ما نتكلم بظهر أحد ونمدحه بوجهه لا نسوي العكس نمدحه بظهره ونتكلم بوجهه ، كذا أفضل .. نحتاج نعيش بروح مرحه وعفويه وخلوقه ، الكل نبيه يكون كذا ، لازم نسعى لتطوير هالأفكار فينا ، لازم نكون يد وحده ، لازم نكون مجتمع مثالي بعيد عن الاساءات والحزازيات ، نكون مسالمين ونحب الخير ..
وختاماً وليس أخيراً ، ما من قلب يسامح إلا عاش مرتاحاً وما من نفس ترضى بالقدر إلا باتت سعيده وما من روح تردد الحمدُلله إلا كانت مُبتسمه ..
لنعد النظر في أفكارنا تجاه الحياة ، ولنستعد ابتساماتنا المشرقة ، فمهما كان ماضينا مليئا بالمشاكل ، فإن المستقبل مفعم بالأمل عامر بالفرص بإذن الله .. أعتذر على الإطاله ،،مع خالص تحياتي وأجملها ،، ورد .. ((مشترك في مسابقة قسم تطوير الذات )) |