السلام عليكم ورحمة الله وبركاته شلووونكم؟ ياهلا وغلا حبابي نزلت لكم موضوع بمناسبة قرب شهر رمضان انزين بما انتوا شايفين ساير عندنا مسلسلات و فوازير و هالخرابيط يلا متى
ياهلا وغلا حبابي نزلت لكم موضوع بمناسبة قرب شهر رمضان
انزين بما انتوا شايفين رمضان ساير عندنا مسلسلات و فوازير و هالخرابيط يلا متى يجي رمضان ابي اتابع هالمسلسل الفلاني مع الاسف هذا حالنا و لا نفكر بالاكل يلا متى يجي رمضان خاطري اكل هريس و لقيمات و اشرب فيمتو خخخخخ مو صح اعرف شلون تفكرون لاني بكل بساطه مثل الكل اتابع مسلسلات برمضان و طول ما انا صايمه يا نايمه يا افكر بالاكل يمكن اشتط بس اول يومين صلاه و غيره مقطعه نفسي و لكن بعدين خلااااص اتكيسل قريني يتغلب علي مع الاسف فلازم هالسنه ياآعضاء وعضوآت هالمنتدى العزيز نغييير من نفسنا أجل احنا قدها شعارنا راح يكون "رمضان هالسنه غير"
كيف نطور من نفسنا هالرمضان و نزيد رصيدنا
أول شي القرآن
القرآن في رمضان لازم نتسابق على ختم القرآن يعني بس تلاوة مب لازم حفظ يعني اقرو بعد كل صلاه اربع يعني اربع صفحات و اذا ودكم تختمون القرآن مرتين اقريو بعد كل صلاة ثمان صفحات و طبعاً نبتدي من سورة الفاتحة و لمن تقرونيا حبايبي اقرو بترتيل و ركزو لا تستعجلون تدبرو الكلام ترى والله عن تجربه شخصيه القرآن فيه وايد كلام حلو و قصص و عبر و مع الوقت بتلاقون نفسكم حتى بالايام العاديه تقرون قرآن وكمان تقدروا تستخدموا التقنية الحديثة في شئ مفيد مثلآ تقرون من الايباد او الايبود او الايفون او الكمبيوت او من اي جوال كلها فيها قرآن و خلونا نشوف فضل القرآن حديث أبي أمامة الباهلي رضي الله عنه قال سمعت رسول الله صلى الله عليه وسلم يقول: (اقرؤوا القرآن فإنه يأتي يوم القيامة شفيعاً لأصحابه). (صحيح مسلم) حديث عبد الله بن مسعود رضي الله عنه قال : قال رسول الله صلى الله عليه وسلم (من قرأ حرفاً من كتاب الله فله به حسنة ، والحسنة بعشر أمثالها لا أقول (الم) حرف ولكن : ألف حرف ولام حرف ، وميم حرف). (صحيح الجامع 6469) و طبعاً فيه احاديث غير بعد و لكن تخيلوا اخواني واخواتي على كل حرف حسنه تخيلو مدى رحمة ربكم و احنا غافلين عنه
الدعاء و الذكر في رمضان
حبايبي الاذكار و الدعاء لا تنسونها في رمضان خصوصاً اذكار الصباح و المساء لا تنسونها حبايبي واضبوا عليها و مع الوقت بتلاحظون انكم ما تقدرون تتركونها و الدعاء ادعوا ترى الدعاء برمضان غير حبايبي اقتربوا من ربكم اكثر
التسبيح في رمضان
حبايبي التسبيح سبحوا و اكثروا من التسبيح ترى الاجر غير برمضان
الصلاة في رمضان
حبايبي الصلاة برمضان لا تنسون الفروض او تأخرونها الله يرضى عليكم و صلاة التراويح ثم صلاة التروايح وللبنات مو لازم تروحون المسجد و كذه بالبيت خصصوا لكم زاويه خاصة و صلوا فيها اول شي تصلون العشاء و سنة العشاء و بعدين تراويح التراويح هي ١١ ركعه مع الشفع و الوتر يعني انتم اذا تتعبون مو لازم تصلونها كلها صلو مثلاً سته بس و بعدين الشفع و الوتر و تقدرون تكملون ختمتكم من القرآن وقت التراويح وآلشباب الله الله بالمسجد داومو عليها و حبايبي حاولوا تصلون السنن على الاقل المغرب و الفجر
التلفزيون في رمضان
التلفزيون وصلنا لنقطه مهمه حاولوا تبتعدون عن التلفزيون ادري في مسلسلات شكلها حلوه هالرمضان حتى انا ودي اشوفها و لكن في بدائل مثل ما مسلسل ساهر الليل حلو حتى برنامج قصة الفاروق لنبيل العوضي شكله حلو نقدر نبدل المسلسل بهالبرنامج مثل ما مسلسل كنة الشام شكله حلو حتى برنامج خواطر ثمانيه شكله حلو نقدر نبدل هاي بذاك ادري انه صعب كلنا نحب المسلسلات لكن لازم نحاول انا وحده احب المسلسلات و اتابعها برمضان و لكن ابي امنع نفسي هالسنه و اغير هالشي عادي استحملي شوي و شوفي هالمسلسل بعد رمضان
الايبود في رمضان
في رمضان خلو الايبود شغال عالقرآن و الاناشيد ابتعدوا عن الاغاني ابتعاد تااام
الصيام في رمضان
في رمضان احنا ما نصوم عن الاكل بس نصوم عن السنتنا بعد يعني من غير حش من غير سب من غير كذب و هالاشياء و غض البصر يعني حاسبوا حبايبي
الصدقه في رمضان
الصدقه حبيباتي اكثروا من الصدقه تصدقوا وااااايد لانها راح تنفعكم يوم القيامه
و بالنهايه ابيكم تتخذون رمضان كزيادة رصيد احنا نقدر بس نركز عالهدف