في البداية أخت ورد اود طرح إعجابي لأجوبتك الصريحة والأسلوب الجميل في الإجابة
أهلاً وسهلاً ، كنت أنتظرك دائماً ..
//
تحمست اني اسألك :)
1/ وش تفضلين أكثر حاجه من الأكل الأكلات الشعبية القديمة ام الأكلات الجديدة .. ؟؟
والله كلها أحبها ، هو على حسب أحياناً تمسك معي على أكلة معيّينه مره شعبيّه وتكون صعب تواجدها مثل خبز التنّور ، أحب اللي يمسك الفحم فيه ويبان طعمه هذا مره مره صعب إني أحصله في الشرقيه وأمي إعتزلت صنعه للأسف ، ومره تمسك معي أكلة جديده بس سهل الحصول عليها وكذا يعني ،، اهم شي الاخلاق وحب الوطن والحمدلله على كل حال ..
2/ وش ميولك للأكل ،، النباتي أم الحيواني .. ؟؟
برضه على حسب المزاج ..
3/ وش اللي يخلي يعكر مزاجك .. ؟؟
إذا أحد عصب علي بسبب أو بدون سبب ، معليش ما أتحمل ابكي على طول ..
وإذا أحد ماصدق شيء أقوله ..
وإذا انتظرت أحد يرسل وما أرسل أو كتب لي حرفين وأكون راسله أنا معروض ..
وإذا زعلت أحد بدون قصد ..
وإذا ما أخذت اللي أبغاه ..
المهم حاجات كثيره والله بس هذا اللي جاء ببالي ، والشيء اللي يخليني أبكي هو أكثر شي يعكر مزاجي ..
4/ كيف تعالجين او وش تسوي عشان تحسنين من مزاجك اذا كان تعكر .. ؟؟
ما رأيك بالمنشأت التي ترفض التوظيف لمن ليس له خبره ؟
وهل هذا هو السبب لجعل اغلب الخريجين عاطلين عن العمل ؟
والله أحس إنو من حقهم ، يعني صعب إنك تخلين أحد يمسك مكان ما هو مره متقن فيه أو يعني صعب إنك تتكلين على أحد منتي ضامنه إنه بيبدع بالمكان اللي بيمسكه ..
أكيد هذا هو السبب ، عشان كذا الشهاده والخبره مهمه للرجل وللمرأه الايام هذي لازم إن كل شخص وشخصه يطمحون لأعلى الشهادات وأعلى الدرجات عشان ما ينحطون في هالمواقف إنو ينرفض توظيفهم أو غيرها ..
يعني تفلسفت على قد تفكيري ..
هديه من الطفوله لا زلتي تحتفظي فيها ؟
درج صغير للأكسسوارات من معلمتي نفداها ..
هل تحلمين بزواج تقليدي او عن حب ؟
يمه
والله كنت اتمنى انه عن حب ، بس ماش ما ظنيت ، حظي سيء جداً في هالطريق الله يمحيه من حياتي هالجانب الغبي ..
هو الواحد يجي رجال ويعرف قيمتي ويعرف ان معه او بياخذ ورده عظيمه ما بيكررها الزمن ؟
هذا أكبر طموحي بلا حب بلا قرف لا ابوهم لا ابو اللي يحبهم يا شيخه
ماذا تريد ورد التغيير والاضافه في شخصيتها الحاليه ؟
والله لمن افكر في كلمة التغيير ..
يختي أحسها مع العمر والمواقف والدروس اللي نشوفها بحياتنا هي اللي تغيرنا ..
يعني بالنسبه لي شخصيتي الحين ؟ غير عن شخصيتي قبل 3 سنوات ..
ولا سعيت لتغييرها كل شيء يتغير من نفسه ..
تفكيري تغيير نوعاً ما ، تصرفاتي ، حتى الاشياء اللي أقدمها تغيرت ..
يعني اللي أقصده انا أتغير كل ما كبرت اتغير تلقائيا من الاشياء اللي اشوفها ..
تعرضت قبل فتره لصدمه عظيمه ، للأمانه غيرت تفكيري كثير كثيييررر ، وبعد أثرت فيني ..
وأكيد مع الأيام بيصير فيه تغيير لكل شيء فيني .. والحمدلله ..
هبه هبو فيها الناس وكرهتيها ؟
اللعبه اللي تطقطق ، قسم بالله اذا طلعنا مكان وسمعت صوتها اروح اتضارب مع الولد اللي ماسكها من كثر ما كرهتها ..
شخصيه في السوشل ميديا تحبي تتابعيها وليش؟
محمد القحطاني ، صوته حلو ماشاء الله وفعاليات يومه تهبببل
اول موقع من مواقع التواصل اضفتيه لجوالك ؟
تويتر ..
فتحتي جوالك وكان فيه تنبيهات ( رسالة وارده ، 10 مكالمات لم يتم الرد عليها ، 2600 رسالة بالواتس اب )
وش اول مايشدك وتفتحينه ؟
أمي ، أكيد بتنبهني على جريمه إكتشفتها وتبغى تقول ابوك يا حيوانه بيجي انتبهي ، لأني معروفه أنا حقت أكشن الله يصلحني ..