08-15-19, 07:37 AM
|
| |
كلشي بالدنيا اله حدود وقياس
هو مو كلمن ينجرح جرحه يطيب
لا ولا كل بيت ضعفه من الاساس
لا ولا كلمن هجر قاعه غريب
كلشي بالدنيا اله احدود وقياس
اكو ناس قلوبها من الهم تشيب
واكو ما مهموم ومشيب الراس
الناس بيها اجروح تحتاج لطبيب
وآني بيا اجروح تحتاجلها ناس
قبل حسرة يخلف بقلبي اليغيب
بإنتظاره ابقى شمع واشواقي ياس
لكن من شفت الغدر من القريب
بدلت دمعي ضحك والسلوى كاس
اني عاشق ضيم واطرب للنحيب
هم شفت شجرة بحياتك تهوى فاس
وآني مكور حزن بس مليان طيب
حتى بلما حاس بيه بضيمه حاس
عاشرت بلبل ربى ولقيته ذيب
وهسة اشك حتى بعوادين الاقفاص
مو عجيبة انخنت بس هو العجيب
تبقى للخاين وفي وقلك اخلاص
ليش يا قلبي لظلمهم نستجيب
ويا بريء ال يقبل بحكم القصاص
لا اتصورلي العدو بصورة حبيب
ولا اتقلي الورد اقسى من الرصاص
ولا اتقلي النار ما بيها لهيب
آني شاعر لا اتصير براسي قاص
الشاعر فاضل عبدالسادة
|