ما رضيتي بالإهانة على حسني مبارك، لكنش رضيتي بالإهانة لشعب كامل!
وبعدين هذي ما تتسمى إهانة له، هو غلط .. وهذا حصاد أغلاطه،
وبعدين احنا قاعدين نتكلم بإنسانية، مو بالمذهبية والديانية !
مو تقولي الشعب المصري فيه الديانة هذي والمذهب هذا ومدري وشو!!
هذا غلط .. وهذا ما يرضاه الإسلام حتى،
وما يجوز لش تظلمي أي أحد لمجرد كونه كافر أو مسيحي أو بوذي أو ديانة أخرى،
وهالمراقص والسينما اللي تتكلمي عنهم، موجودين بوجود حسني مبارك في مصر!
ما هم موجودين بعد ما أُسقِط حُسني مبارك عشان تقولي أنتم تبغوا مراقص وسينما،
والمراقص والسينما عندهم يا بتي منذ مبطي،
والحرية اللي يطالب فيها الشعب المصري هي نفسها الحرية اللي يطالب فيها أي شعب عربي !!
حرية التعبير عن الرأي .. حرية إختيار الرئيس،
وهذي الحرية حق من حقوق الإنسان أيًّا كان مذهبه أو دينه،
كما أنهم يطالبوا بحقوقهم المسلوبة، شوفي الملايين اللي عند حسني مبارك ..
وكيف شعبه عايش؟!
شايفة كيف شعبه عايش؟!
شايفة في أي زبالة معيشهم؟!
شايفة أي فقر هم يعيشوه؟!
وليش وش شايفين احنا من حكام العرب أصلًا؟!
ولو تبهذلوا هذا شي يستحقوه .. في حالتهم احنا نقول ( جنت على نفسها براقش ) ونسكت!
بعد كل اللي يسووه في شعبهم إنتين ما زلتي تشوفي الشعب هو الفاسد
والحاكم هو الطيب الحنون الكريم اللي ما فيه زيه!
شعب بأكمله وبجميع مذاهبه ودياناته فاسد .. بس الحاكم ما شاء الله هو الصالح!

والله العظيم أنا لو انترك لي المجال الحين ما بسكت،
بس أنا حسيت حالي الحين طولتها وقلت اللي المفروض ينقال،
نقطة .. انتهى. :)

أعتذر على طريقة الرد لكن مُتعصب جدًا من ناحية الحرية،
ومن ناحية المُطالبة بالحقوق.